Oppas wat jy sê...

En dink veral voor jy praat.

Hoe dikwels is ons woorde, lippe en tonge vinniger as ons verstand. Dan maak ons seer. Breek ons af. En ‘n situasie wat so anders kon uitdraai, is nou aan jou tong se genade oorgegee.

Spreuke 10 vers 19 sê dat die mens wat baie praat, maklik die verkeerde dinge sê; die mens wat versigtig is en dink voordat hy praat, is verstandig.

Ek ken mooi vriendskappe wat verbreek is omdat iemand nie gedink het voor hulle praat nie. Ek weet van vertrouensverhoudinge wat vir altyd verbrokkel is. Ek ken ouers wat van hul kinders vervreemd is en familiebande wat nou al vir jare aan’t skerwe lê, want iemand was baie vinnig, baie bitsig met die mond.

Sommige mense is sensitief,ja. Maar dit gee ons nie die reg om links-en-regs net te sê wat ons wil, sonder om daaroor na te dink nie. Ek glo in Albert Mehrabian se sêding: it’s not what you say, it’s how you say it. En ek glo in Spreuke. Dat ‘n sagte antwoord die grimmigheid afkeer, maar die krenkende woord die toorn laat opkom. Dat die tong van die wyse getuig van grondige kennis, maar die mond van die dwase laat sotheid uitborrel.

Oppas wat jy tik. En dink veral voor jy post.

Hoe dikwels is ons woorde, ons vingers en ons fone vinniger as ons verstand...

Baie liefde,

Alvené